Kej w keryś gorki latowy dziyń napoczło loć nad Muminkowom Dolinom, Muminki napoczły grać we szukaniy. Sznupek stanoł do eki ze zawartymi łoczami i porachowoł do dziesiynciu, wtynczos sie łodwyrtnoł i napoczon szukać reszta czelodki. Nojprzod we ańfachowych schroniyniach, a niyskorzyj w tych wiyncyj maszketnych. Muminek legnoł sie pod stołym we laubie. Trocha było mu gańba. Wiedzioł, co to niy dobry plac. Sznupek na zicher hned wejrzy pod serwet i wtynczos go znojdzie. Kuknoł na lewo, kuknoł na prawo i wtynczos spomnioł mu sie tyn srogi czorny hut, kery oś łostawioł stoć w ece. Muminek gibko ku niymu podrałowoł i wrazioł sie go na gowa. Hut siyngoł mu prawie do pasa, nale styknie, co sie siupnie i schowie łogon, a żodyn niy bydzie go widzieć.
